नेपाल मै पहिलो पटक ग्रीनसिटीले गर्यो छाती नचिरी मुटुको शल्यक्रिया
जेठ,१९,काठमाडौं । काठमाडौस्थित धापासीमा रहेको ग्रिनसिटी अस्पतालले मुटुमा जटिल समस्या भएका एक बिरामीको निःशुल्क शल्यक्रिया गरेको छ । जन्मजात नै मुटुमा प्वाल लिएर जन्मेका ३४ वर्षीय कमल धमलालाई असपतालले यो सेवा दिएको हो । यस प्रकारको शल्यक्रियालाई ‘मिनिमल्ली इनभ्यासिभ कार्डियाक सर्जरी’ भनिन्छ । डा. अनिल भट्टराई नेतृत्वको टोलीले कमलको मुटु छेउ रहेको दुईवटा करङको बीच प्वाल बनाई सफल शल्यक्रिया सम्पन्न गरेको अअस्पतालले आयोजना गरेको पत्रकार सम्मेलनमा जानकारी गराईयो । मुटु रोगी कमलको दाहिने फोक्सोबाट आउने सफा रगत बोक्ने नली देब्रेतर्फ खुल्नपर्नेमा दाहिनेमा खुलेको उपचार पनि अस्पतालले गरिदिएको छ । यसलाई चिकित्सकीय भाषामा पार्सियल एनोमेलस पल्मोनरी भेनोस कनेक्सन (पिएपिभिसी) भनिन्छ । त्यसै पनि मुटुको शल्यक्रिया जटिल हुन्छ, यो समस्याले उनमा अझै जटिलता थपेको थियो । ‘यस्तो केसमा सानो प्वाल पारेर शल्यक्रिया गरिएको नेपालमै पहिलोपटक हो,’ डा. भट्टराईले भने । यस पद्धतिद्वारा अपरेशन गर्दा विरामीको छाति चिर्नु पर्दैन । मुटुको दाहिने तर्फको दुई करङको बीचमा ४ देखि ६ सेन्टिमिटर सम्मको सानो प्वाल बनाएर अपरेशन गर्न सकिन्छ । यसरी अपरेशन गर्दा विरामीलाई कम क्षति पुग्ने तथा उनीहरु सामान्य व्यक्तिसरह छिट्टै हिंडडुल गर्न सक्छन् ।