नेपाली हेल्थ
गीता कुँवर र उनका चम्ल्याहा सन्तान ग्रिनसिटी हस्पिटलमा
काठमाडौँ – एकैपटक जन्मेका चारजना (चम्ल्याहा) शिशुको उपचार बसुन्धरास्थित ग्रिनसिटी हस्पिटलले निशुल्क सुरु भएको छ । चार मध्ये गम्भीर विरामी भएका एकलाई एनआइसीयुवार्डमा र अरु सामान्यलाई विशेष वार्डमा राखेर उपचार सुरु भएको अस्पतालले जनाएको छ ।
गुल्मी जैसीथोक २ रातापोखराकी २६ बर्षीया गीता कुवरले गत ३० पुसमा पाल्पास्थित लुम्विनी मेडिकल कलेज शिक्षण अस्पतालमा ४ मिनेटको अन्तरमा ४ जना शिशु जन्माएकी थिइन । दुई छोरा र दुई छोरी स्वस्थ रुपमा जन्मिएपनि दोस्रो शिशुमा केही समय अघि देखी गम्भीर स्वास्थ्य समस्या देखा परेको छ ।
सन्तान जन्माउनु अघि देखी नै अस्पताल बसेको कुवर परिबारले आर्थिक अभाव भएको भन्दै बच्चाको उपचारका लागि सार्वजनिक रुपमा अपिल जारी गरेपछि ग्रिनसिटी अस्पताल सहयोगका लागि अघि सरेको हो ।
‘तीन जनाको अवस्था सामान्य नै छ । एक जना अलि गम्भीर छ । देब्रे आँखामा गम्भीर समस्या छ , र उसलाई जण्डिस भएको छ । त्यसैले उसलाई एनआइसीयुमा राखी उपचार सुरु गरिएको छ,’ अस्तपालका अध्यक्ष लोकबहादुर टण्डनले नेपाली हेल्थसंग भने ।
त्यसो त अस्पतालले शिशुहरुसंग आएका आमा गीता, बाबु जनक कुँवर, शिशुका हजुरआमा र फुपु गरी चार जनाको खानेबस्ने समेत निशुल्क गरिदिएको जनाएको छ ।
शिशुका बाबु जनक कुँवरले सन्तान जन्माउनु अघि र पछि गरी करीब ४ महिना अस्पताल बस्दा ५ लाख बढी खर्च भएको भन्दै थप उपचारका लागि सहयोग माग्न थालिएको बताए । उनले दोस्रो शिशुको देब्रे आँखामा इन्फेक्सन भएर देख्नै नसक्ने भएपछि दाईने आँखा जोगाउन काठमाडौँ ल्याएको बताए ।
‘भैरहवास्थित लुम्विनी रणअम्बिका अस्पताल पुरयायौँ त्यहाँका डाक्टरले उपचार गर्छौ तर दुबै आँखा ज्योति गुम्छ भने । त्यसपछि हामी ऋण खोजेर काठमाडौँ आयौँ । यहाँ आउदा सहयोगी हात भेटियो । ग्रिनसिटीले हामीलाई सहयोग गरयो ।’
अस्पतालका अध्यक्ष टण्डनले शिशुका लागि कम्तीमा २१ दिनसम्म राख्नुपर्ने भएकोले सो अवधीको सम्पूर्ण खर्च अस्पतालले वेहोर्ने निर्णय भएको बताए । उनले त्यसपछि समेत सहयोग गर्न परे अस्पताल पछि नपर्ने बताए ।
चार बच्चा रहेको थाह पाएपछि कुँवर दम्पत्तीले गर्भपतन गर्न खोजेका थिए
अस्पतालमा भेटिएका जनकले श्रीमतीको कोखमा चार बच्चा रहेको थाह पाउनासाथ गर्भपतन गर्न खोजेका थिए । तर चिकित्सकले स्वस्थ रहेको भन्दै गर्भपतन नगर्न सल्लाह दिएपछि उनी पछाडी हटेका थिए ।
‘तीन महिनाकै समयमा अस्वाभाविक रुपमा श्रीमतीको पेट ठूलो हुँदै गयो । अनि तम्घासमा रहेको श्रृजना मेडिकल हलमा भिडियो एक्सरे गरायौँ । लुम्विनी मेडिकल कलेजका डाक्टर बुद्धिकुमार श्रेष्ठले तम्घासमै गएर हेर्नु भएको थियो । उहाँले नै बच्चा स्वस्थ रहेकोले गर्भपतन नर्गन सल्लाह दिनुभयो । त्यसपछि हामी पछाडी हट्यौँ ‘ जनकले नेपाली हेल्थसंग भने ।
६ महिना देखी नै तानसेन आई निरन्तर चिकित्सकको निगरानीमा बसेकोले ८ महिनामा स्वस्थ बच्चा जन्माउन सफल भएको जनकले बताए । उनले अस्पतालले करीब २ लाख बराबरको उपचार निशुल्क गरिदिएको बताए ।
अघिल्लो पटक जुम्ल्याहा थिए
२०६९ सालमा विहाव गरेको कुँवर दम्पतीले २०७० सालमा जुम्ल्याहा छोरा जन्माएका थिए । तर ती सन्तानको उमेर एक साताको मात्रै रहयो । बुटवलस्थित आम्दा हस्पिटलमा स्वस्थ रुपमा जन्मेका दुई छोराहरु सात दिन र आठ दिनका दिन परलोक भए ।
पछिल्लो एकैपटक चार सन्तान जन्माएर देश विदेशमा चर्चा कमाएका कुँवर दम्पतीले बच्चाएको स्याहार सुसार उपचारमा भने निक्कै अप्ठेरो परेको बताए ।
उनले भने , चार वटा बच्चा छन, हेर्ने मान्छे पनि उत्तिकै चाहियो , एउटा विरामी हुँदा पनि आमा सहित चारजनालाई नै लिएर हिडनुपरयो । निकै गाह्रो हुँदो रहेछ । त्यसैले यी बच्चा नहुकन्जेलसम्मका लागि अस्पतालको नजिक बस्ने व्यवस्था कसैले मिलाइदिए निकै आभारी हुने थिए ।
सहयोग गर्न चाहनेका लागि बैँक खाता खुलेको छ
चम्ल्याहा बच्चाको हेरचाह र उपचारका लागि सहयोग गर्न चाहनेका लागि ग्रिनसिटी अस्पतालको रोहबरमा बाबु जनक कुँबर नाममा बैँक खाता खोलिएको छ । नविल बैक महाराजगञ्ज शाखामा खोलिएको खाता नम्बर १५१००१७५०४८६४ मा सहयोगी मनहरुले रकम जम्मा गर्न सक्नुहुनेछ ।
- See more at: http://www.nepalihealth.com/2016/03/04/3674/#sthash.wtS9wcyc.dpuf